No set Høgre og Venstre foten ned. I vårt samarbeidsbudsjett foreslår vi ei historisk styrking av skule- og barnehagesektoren på over 15 prosent i 2026. Det gjer meir enn å reversere kutta – det er eit nødvendig første steg for å rette opp den uretten AP/SP/INP/SV har påført barna, foreldra og tilsette.
Dette handlar ikkje berre om tal i eit budsjett. Det handlar om barns framtid, om grunnmuren i eit godt lokalsamfunn – og om retten kvar elev har til ein skule og ein barnehage som gir læring, tryggleik og utvikling.
Vi set barna først – ikkje sist
Gode barnehagar og skular er fundamentet i eit demokratisk og inkluderande samfunn. Her lærer barn språk, samarbeid, kreativitet og dei sosiale ferdigheitene som formar dei som menneske. Foreldre skal kunne levere barna sine til ein trygg barnehage med nok folk – ikkje til ein kvardag som går heilt på felgen.
I dag ser vi dessverre mange heilt konkrete utslag av kutta dei siste to åra:
- Barnehagane manglar folk, og tilsette må springe raskare enn nokon gong.
- Elevane får mindre tid med læraren, og fleire elevar slit med å få tilpassa opplæring.
- Skulane manglar moderne læremiddel – både digitale og fysiske.
- Arbeidet med psykisk helse og elevmiljø er underdimensjonert, samtidig som behova aukar.
Dette er kvardagen vi no snur.
Vi møter Barnehageopprøret – og vi tek saka deira på alvor
Barnehageopprøret har peikt på alvorlege strukturelle problem. Dei har heilt rett: bemanning, ressursar og kvalitet har vore under press altfor lenge. Høgre og Venstre lyttar og følgjer opp. Vi vil sikre betre bemanning, meir forutsigbare rammer og ei økonomi som gjer rom for både tryggleik og fagleg utvikling. Barnehageopprøret skal vite at dei ikkje protesterer i fåfengd.
Konkrete satsingar for barn og unge i Haram
Høgre og Venstre legg fram eit budsjett som både snur utviklinga og løftar tenestene opp att. Satsingane våre er målretta, konkrete og vil merkast i klasserom, på lærarrom, i barnehagar og i fritida til barn og unge.
Store og nødvendige løft:
- 5 millionar kroner til IKT i skulen
(2,5 mill. i 2026 og 2,5 mill. i 2027)
Oppgradering av utstyr og betre digitale verktøy for læring.
- 5 millionar kroner til fysiske skulebøker
(2,5 mill. i 2026 og 2,5 mill. i 2027)
Ei god balanse mellom skjerm og bok – og solide læremiddel som varer.
- 5 millionar kroner til oppgradering av idrettshallen ved Brattvåg ungdomsskule
Ei trygg og moderne hall for kroppsøving, idrett og aktivitet.
Styrking av barn og unges moglegheiter:
- 500 000 kroner per år til fleire kommunale lærlingar
Ei sterkare bru mellom skule og arbeidsliv.
- 50 000 kroner meir per år til ungdomsrådet (og eldrerådet)
Meir medverknad, sterkare demokrati og større påverknadskraft lokalt.
- 2 millionar kroner per år til praktisk linje på ungdomsskulen
For dei som lærer best gjennom praktiske oppgåver og meistring.
- 4 millionar kroner per år til eit styrkt psykisk helseteam for unge
Tidleg innsats, rask hjelp og fagleg solide tenester.
- 250 000 kroner ekstra til styrking av symjeopplæringa
Livsviktig kunnskap – og tryggleik i vatn.
Vi tek ansvar – vi byggjer framtida!
Høgre og Venstre vel å prioritere det viktigaste vi har: barna og ungdommen vår. Vi investerer i kunnskap, kvalitet, trivsel og tryggleik – ikkje i kutt. Etter to år der skular og barnehagar har blitt sette til side, kjem vi no med eit budsjett som gjer håp, retning og framtidstru.
Dette budsjettet løftar sektoren ut av uføret – og set kursen mot ein betre, tryggare og meir framtidsretta skule og barnehage for alle i Haram.