Kommunedirektøren har i si vurdering gjort ei nøktern utrekning av dei ekstra kostnadene ved å halde Lepsøy barnehage open, samanlikna med å gi barna plass i andre barnehagar berre få minutt unna – med same bemanningsnorm og kvalitet.
Tala er tydelege. Ved ei nedlegging ville kommunen spart om lag 1,4 millionar kroner årleg berre til drifta når tiltaket har full verknad. Innsparinga kjem i hovudsak av:
- redusert styrarressurs (om lag 0,5 mill. kr),
- ei heil pedagog- eller fagarbeidarstilling (om lag 0,8 mill. kr),
- samt lågare bygg- og vedlikehaldskostnader.
Men dette er ikkje heile biletet.
Når kommunen reduserer kostnadene i dei kommunale barnehagane, får det også konsekvensar for overføringane til private barnehagar. Desse overføringane er direkte knytte til gjennomsnittskostnaden i dei kommunale barnehagane, og blir justerte med to års etterslep.
Det betyr at ei samanslåing av barnehagane på Lepsøya og Haramsøya i 2026 ville gitt:
- ein halvårsverknad på om lag 600 000 kroner i reduserte overføringar i 2028,
- og deretter ein heilårsverknad på om lag 1,2 millionar kroner årleg frå og med 2029.
Dette er reelle pengar som kommunen må betale ut.
Likevel vart denne effekten ikkje nemnd i den politiske debatten. I staden fekk ein inntrykk av at alternativet til dagens løysing var eit dårlegare barnehagetilbod for barna. Det stemmer ikkje. Barna ville fått plass i nærliggande barnehagar få minutt unna med same bemanning og faglege krav.
For Venstre handlar dette om prioriteringar. Vi meiner det er feil å bruke store summar på å halde oppe svært små einingar, når dei same midlane heller kunne blitt brukte til å styrkje kvaliteten i barnehagetilbodet for langt fleire barn.
Med nær 2,6 million kroner årleg i frigjorte midlar kunne kommunen:
- auka bemanninga i dei kommunale barnehagane,
- styrkt det spesialpedagogiske arbeidet,
- gitt dei tilsette betre rammer for tidleg innsats og tettare oppfølging.
Færre, men betre rusta barnehagar gir meir kvalitet – ikkje mindre. Det er slik vi skaper reell bolyst: gjennom gode tenester, sterke fagmiljø og trygg kvardag for barna, ikkje ved å binde store ressursar i kostbar struktur.
Venstre ønskjer ein barnehagepolitikk der pengane i størst mogleg grad går til barna og det pedagogiske arbeidet. Den debatten tok ikkje fleirtalet. Det meiner vi er synd – både for barnehagane og for Haramssamfunnet som heilskap.
Christian Holstad Lilleng
Gruppeleiar Haram Venstre